हामी एक्लै १५० सिट जित्छौँ – अध्यक्ष ओली

पूर्वप्रधानमन्त्री समेत रहेका ओली आज दिनभर झापा क्षेत्र नम्बर–५ मा आयोजना गरिएका विभिन्न कार्यक्रममा सहभागी हुँदै अगुवा कार्यकर्तालाई चुनावी गतिविधि बढाउन निर्देशन समेत दिए ।

अघिल्लो निर्वाचनको स्मरण गर्दै अध्यक्ष ओलीले भने, “अघिल्लो निर्वाचनमा हामीले प्रत्यक्षमा ८० सिट र समानुपातिकमा ४१ सिट जितेका थियौँ । तर, दुईतिहाइ बहुमत ल्याउन १३८ सिट चाहिन्थ्यो । अहिले हामी एक्लै १५० सिट जित्ने योजनाका साथ अघि बढेका छौँ र जित्छौँ पनि ।” झापामा एमालेले राष्ट्रिय प्रजातन्त्र पार्टी (राप्रपा)सँग चुनावी तालमेल गरेको छ । झापा क्षेत्र नम्बर–३ मा राप्रपाका अध्यक्ष राजेन्द्र लिङदेन चुनावी मैदानमा छन् । झापा–५ मा ओली उमेदवारका रूपमा उभिएका छन् । उनले आम मतदातालाई झापा–३ मा हलोमा मतदान गर्न र झापा–५ मा सूर्य चिह्नमा मतदान गर्न आग्रह समेत गरे । रासस