अमेरिकामा हिरासतबाट जमानतको निवेदन दिन अब नपाउने

३२ असार काठमाडौं । अमेरिकामा गैरकानुनीरूपमा प्रवेश गर्ने आप्रवासीहरूले अब जमानत सुनुवाइका लागि अध्यागमन न्यायाधीशसमक्ष अनुरोध गर्न नपाउने भएका छन् । ट्रम्प प्रशासनले देशमा गैरकानुनीरूपमा प्रवेश गर्ने आप्रवासीहरूलाई हिरासतमा राख्ने प्रयासलाई तीव्र बनाइरहेको बेला यो नयाँ नीति घोषणा गरिएको छ ।

गतहप्ता अमेरिकाको भन्सार तथा अध्यागमन निकाय (आईसीई) कार्यवाहक निर्देशक टोड लायन्सद्वारा जारी गरिएको विज्ञप्तिमा यो नीति परिवर्तनको घोषणा गरिएको थियो, जसको विवरण एबीसी न्यूजले प्राप्त गरेको थियो ।यो नीति परिवर्तनअघि आप्रवासीहरूले आप्रवासन न्यायाधीशसमक्ष जमानतका लागि अनुरोध गर्न सक्थे ।

तर, यो नयाँ नीतिले उक्त अवसरलाई बन्द गर्नेछ, जसले गर्दा धेरै व्यक्तिलाई लामो समयसम्म हिरासतमा राख्न सकिनेछ ।यो विस्तारित हिरासत नीतिविरुद्ध कानुनी चुनौतीहरू आउने अनुमान गरिएको छ । आप्रवासी अधिकारकर्मीहरूले यो कदम संविधानविपरीत र मानवअधिकारको उल्लंघन भएको बताएका छन् ।