न्युजिल्यान्डकी पूर्वप्रधानमन्त्री जसिन्डाले छाडिन् देश

२५ फागुन काठमाडौं । न्युजिल्यान्डकी पूर्वप्रधानमन्त्री जसिन्डा अर्डर्नले देश छाडेर अस्ट्रेलिया सरेकी छन् । न्युजिल्यान्डका नागरिकहरूका लागि देश छोडेर विदेशमा बसोबास गर्नु सामान्यजस्तै बनेको स्थितिमा जसिन्डाले पनि देश छाडेकी हुन् ।

पछिल्ला वर्षहरूमा देश छोड्ने न्युजिल्यान्डका नागरिकहरूको संख्या कीर्तिमानी स्तरमा पुगेको छ । तीमध्ये ठूलो हिस्सा अस्ट्रेलियातर्फ पलायन भइरहेका छन् । पूर्वप्रधानमन्त्री जसिन्डा यो लर्कोमा सामेल हुने पछिल्लो व्यक्तित्व बनेकी छन् ।सिड्नीको विकसित उत्तरी तटीय क्षेत्रमा घर खोज्दै गरेको देखिएपछि गत हप्ता उनको कार्यालयले उनी र उनको परिवार सिड्नी सरेको पुष्टि गरेको छ ।

जसिन्डाको यो कदमले न्युजिल्यान्डबाट भएका प्रतिभा पलायन रोक्ने चुनौतीलाई पुनः चर्चामा ल्याएको छ । न्युजिल्यान्ड हाल सुस्त अर्थतन्त्र, जीवनयापनको बढ्दो लागत र आवासको अभावसँग जुधिरहेको छ ।“जसिन्डाको यो बसाइँसराइलाई व्यापक प्रवृत्तिको प्रतीकका रूपमा हेरिने सम्भावना छ । कसै–कसैका लागि यो पलायनको रूपमा अर्थ्याइनेछ,” अस्ट्रेलियन नेशनल युनिभर्सिटीको माइग्रेसन हबका निर्देशक एलन ग्याम्लेनले बीबीसीलाई बताए ।

गत वर्ष ६६ हजारभन्दा बढी न्युजिल्यान्डका नागरिकहरूले देश छोडे । यो प्रवाहलाई न्युजिल्यान्ड फर्कनेहरूले केही हदसम्म सन्तुलनमा राख्न खोजेका छन् । तर, ५३ लाख जनसंख्या मात्र भएको राष्ट्रका लागि ठूलो संख्यामा नागरिकहरू गुमाउनु अर्थपूर्ण मानिएको छ ।न्युजिल्यान्ड तुलनात्मक रूपमा सुरक्षित देश हो र प्राकृतिक दृश्यका लागि विश्वभर प्रसिद्ध छ । न्युजिल्यान्डमा औसत आयु पनि उच्च छ ।