प्रधानमन्त्री कर्तव्य पूरा गर्न सक्नुहुन्न भने मार्ग प्रशस्त गरेको राम्रो – हर्क साम्पाङ
७ जेष्ठ काठमाडौं । श्रम संस्कृति पार्टीका नेता हर्कराज राईले प्रधानमन्त्री सदनमा आएर जवाफ दिनुपर्ने हो कि होइन भनि सोधेका छन् उनले बिहीबारको प्रतिनिधिसभा बैठक सुरु भएलगत्तै समय मागेर नियमावलीको नियम १५ (२) अनुसार सांसद्को प्रश्नको उत्तर दिनुपर्ने बताए । “प्रधानमन्त्रीज्यू सदनमा आएर सांसदहरूले उठानुभएका प्रश्नको उत्तर दिनुपर्ने हो या होइन । उत्तर दिनुपर्ने हो या होइन ?” उनले भने ।
उनले आफूले वैशाख २८ र २९ गते गृह र रक्षा मन्त्रालयसँग सम्बन्धित प्रश्न राखेको बताए । रक्षा मन्त्रालय पनि प्रधानमन्त्रीसँगै भएकाले उनले नै जवाफ दिनुपर्ने माग राखे । “ती प्रश्नको उत्तर प्रधानमन्त्रीले आएर दिनुपर्छ,” उनले भने ।
उनले प्रधानमन्त्रीले कर्तव्य पूरा गर्नुपर्दैन भनि सोधे । “उहाँ यो पार्लियामेन्टको मेम्बर हो कि होइन ? यो देशमा पार्लियामेन्ट छ कि छैन ? सबै जनाले लोकतन्त्र, संसद्को गरिमालाई जोगाइराख्नुपर्छ कि पर्दैन ? कर्तव्य पूरा गर्नुपर्छ कि पर्दैन,” उनले सोधे ।
कर्तव्य पूरा नगरे मार्ग प्रशस्त गर्दा राम्रो हुने सुझाव दिए । “यदि उहाँ आफ्नो कर्तव्य पूरा गर्न सक्नुहुन्न भने उहाँले मार्ग प्रशस्त गर्दा राम्रो,” उनले भने । उनले प्रधानमन्त्री संसद्प्रति जवाफदेही नभए को प्रति जवाफदेही हुने ? भन्ने प्रश्न गरे ।
