अमेरिकाबाट धम्की आउनुले आशंका जन्मियो – अध्यक्ष नेपाल

१३ फागुन काठमाडौं । सत्तारुढ नेकपा (एकीकृत समाजवादी)का अध्यक्ष माधवकुमार नेपालले यथास्थितिमा एमसीसीलाई अनुमोदन गर्न नसकिने बताएका छन् । शुक्रबार कैलालीको धनगढीमा आयोजित पत्रकार भेटघाटमा अध्यक्ष नेपालले यथास्थितिमा एमसीसी सम्झौतालाई संसद्बाट अनुमोदन गराउन नसकिने अडानमा आफूहरू कायमै रहेको बताए । एमसीसी सम्झौताका कतिपय प्रावधानहरू आपत्तिजनक रहेको भन्दै उनले आफूहरूले ती प्रावधानहरूलाई सच्याउनका लागि बारम्बार कुरा राख्दा पनि सच्चिन नसकेको गुनासो गरे । अध्यक्ष नेपालले एमसीसी अनुमोदनका लागि अमेरिकाबाट धम्कीपूर्ण अभिव्यक्ति आउनुले पनि यसप्रति अझ बढी आशंका बढाएको तर्क गरे ।