कम्बोडिया र थाइल्यान्डबीचको सीमा विवाद समाधान गर्न तयार छौँ – चीन
२७ असार काठमाडौं । चीनले कम्बोडिया र थाइल्यान्डलाई दुई देशको सीमा विवादलाई मैत्रीपूर्ण संवादमार्फत समाधान गर्न आग्रह गरेको छ । चीनको विदेश मन्त्रालयले निष्पक्ष र तटस्थ अडान कायम राख्दै आफू रचनात्मक भूमिका खेल्न तयार रहेको जनाएको छ ।
विदेशमन्त्री वाङ यीले मलेसियामा आयोजित आसियान शिखर सम्मेलनको अवसरमा बिहीबार थाई समकक्षी मारिस संगियाम्पोङ्सासँगको भेटमा छिमेकी देशहरूबीच शान्तिपूर्ण सहअस्तित्वका लागि आग्रह गरेको मन्त्रालयले एक वक्तव्यमा जनाएको छ ।
“चीन निष्पक्ष र तटस्थ अडान कायम राख्दै थाइल्यान्ड र कम्बोडियाबीचको सौहार्दपूर्ण सहअस्तित्वका लागि रचनात्मक भूमिका खेल्न तयार छ,” वाङले भनेका छन् ।
गत मे महिनाको अन्त्यदेखि सीमा विवादका कारण दक्षिणपूर्वी एसियाली छिमेकीहरूबीच तनाव बढेको छ । ८२० किलोमिटर लामो विवादित सीमा रहेको दुई देशबीच भएको गोलीबारीमा एक कम्बोडियाली सैनिकको मृत्यु भएको थियो ।
गत महिना कम्बोडियाले अन्तर्राष्ट्रिय न्यायालय (आईसीजे)लाई विवाद समाधान गर्न आग्रह गरेको थियो ।
वाङले सोही दिन कम्बोडियाली विदेशमन्त्री प्राक सोखोनसँगको भेटमा सीमा मुद्दामा चीन तटस्थ रहेको बताएको मन्त्रालयले जनाएको छ । अमेरिकी भन्सार करलाई संकेत गर्दै उनले दक्षिणपूर्वी एसियासँग जटिल परिस्थितिको सामना गर्ने र साझा हितहरूका साथै व्यक्तिगत राष्ट्रहरूको हितहरूको रक्षा गर्ने क्षमता रहेको विश्वास चीनले राखेको बताए ।
