अमेरिकाले प्रतिबन्ध हटाएपछि बेलारुसले गर्यो १२३ कैदी रिहा
२८ मंसिर काठमाडौं । बेलारुसले प्रमुख विपक्षी कार्यकर्ता मारिया कोलेस्निकोभालगायत १२३ कैदी रिहा गरेको छ । अमेरिकाले देशमाथि लगाएको प्रतिबन्ध हटाउन सहमति जनाएपछि यो कदम चालिएको बीबीसीले जनाएको छ ।नोबेल शान्ति पुरस्कार विजेता एलेस बियालियात्स्की पनि रिहा हुनेमध्ये एक छन् । यो रिहाइ अमेरिकी राष्ट्रपति डोनाल्ड ट्रम्पका बेलारुसका निम्ति विशेष दूत जोन कोलसँग मिन्स्कमा भएको वार्तापछि गरिएको हो ।
अमेरिकाले पोटासमाथिको प्रतिबन्ध हटाउन सहमति दिएको छ । पोटास मलको एक प्रमुख तत्त्व हो । रुसको नजिकको सहयोगी बेलारुसका निम्ति यो महत्त्वपूर्ण निर्यात वस्तु मानिन्छ ।कोलले भने, “जसरी दुई देशबीचको सम्बन्ध सामान्यीकरण हुँदै जान्छ, त्यसैअनुसार थप प्रतिबन्ध हटाइनेछ ।”बेलारुसका राष्ट्रपति अलेक्जेन्डर लुकाशेन्कोलाई युरोपेली संघले पदमा मान्यता दिएको छैन ।
रिहाइपछि खुसी र अपिल
कोलेस्निकोभा सन् २०२० देखि जेलमा थिइन् । उनले लामो समय एकान्त कारावासमा बिताएकी थिइन् । रिहाइपछि प्रतिक्रिया दिँदै उनले आफूलाई अविश्वसनीय खुसी महसुस भएको बताइन् । प्रियजनलाई भेट्न तथा अँगालो हाल्न पाउँदा अत्यन्तै खुसी लागेको उनले उल्लेख गरिन् ।
उनले भनिन्, “मेरो स्वतन्त्रताको पहिलो सूर्यास्त देख्न पाउनु ठूलो खुसी हो । यो अद्भुत सुन्दरता हो । तर, हामी ती मानिसका बारेमा पनि सोचिरहेका छौँ, जो अझै स्वतन्त्र भएका छैनन् । म त्यो क्षणको पर्खाइमा छु, जब हामी सबैले एकार्कालाई अँगालो हाल्न सक्छौँ, जब सबै स्वतन्त्र हुन्छन् ।”
युद्धबन्दीको उपचारका निम्ति किएभस्थित समन्वय मुख्यालयका अनुसार, कोलेस्निकोभालाई अरू ११३ कैदीसहित युक्रेनलाई हस्तान्तरण गरिएको छ ।
युक्रेनले टेलिग्राममार्फत जारी गरेको एक वक्तव्यमा आवश्यक चिकित्सा सहायता प्रदान गरिसकेपछि उनीहरूलाई पोल्यान्ड र लिथुआनिया पठाइने जनाएको छ ।
