नेपाली विदेश जाँदा आठ महिनामा बाहिरियो झण्डै डेढ खर्ब

२० चैत काठमाडौं । चालु आर्थिक वर्ष २०८२/८३ को पहिलो आठ महिनामा नेपालीहरू विदेश जाँदा एक खर्ब ४५ अर्ब १२ करोड रुपैयाँ बाहिरिएको छ ।नेपाल राष्ट्र बैंकले बिहीबार सार्वजनिक गरेको विवरणअनुसार, ०८२ साउन १ गतेदेखि फागुन मसान्तसम्मको अवधिमा उक्त रकम नेपालबाट बाहिरिएको हो । बितेको आठ महिनामा अध्ययनको लागि विदेश जाने नेपाली विद्यार्थीमार्फत मात्र ९७ अर्ब रुपैयाँ देशबाट बाहिरिएको राष्ट्र बैंकको तथ्यांकले देखाउँछ ।

अघिल्लो आर्थिक वर्ष ०८१/८२ को पहिलो आठ महिनाको तुलनामा चालु आर्थिक वर्षको सोही अवधिमा नेपालीसँगै बाहिरिने रकम १.७ प्रतिशतले घटेको छ । अघिल्लो आर्थिक वर्ष ०८१/८२ को पहिलो आठ महिनामा नेपालीहरू विदेश जाँदा एक खर्ब ४७ अर्ब ५७ करोड रुपैयाँ बाहिरिएको थियो । उक्त रकममध्ये ८८ अर्ब ९२ करोड रुपैयाँ विदेश अध्ययन गर्न जाने विद्यार्थीले लगेका थिए ।