पार्टी प्रवक्ता को भन्ने विषयमा नेता भट्टराईले दिए यस्तो प्रतिक्रिया
२६ भदौ काठमाडौं ।आज एमालेका स्थायी कमिटी सदस्य तथा प्रचारविभाग प्रमुख योगेश भट्टराईले पार्टीको प्रवक्ताका विषयमा आगामी बैठकले टुंगो लगाउने बताएका छन् ।
आज बसेको स्थायी कमिटी बैठकपछि उनले प्रवक्ताका विषयमा स्पष्टीकरण दिएका हुन् । एमाले २०७५ जेठ २ मा फर्किएको भनिए पनि भट्टराईले प्रवक्ताको जिम्मेवारी नपाएको भन्दै आलोचना भएको थियो ।
“सबै कमिटीलाई जेठ २ मा फर्काउने भनेका छौं । त्यतिबेला हाम्रो पार्टीमा प्रवक्ता भन्ने थिएन । त्यतिबेला म प्रचारविभाग प्रमुख थिएँ । प्रवक्ता तोकिएको थिएन । प्रचारविभाग प्रमुखले नै मिडियालाई निर्णय जानकारी दिने गर्दा मै प्रवक्ता हो कि भन्ने परेको हो,” उनले भने, “तर, फागुन २३ मा पार्टी एमाले र माओवादीको रुपमा विभाजन भएपछि लामो समय हामीले बैठकमा भाग नै लिएनौं । १० बुँदे प्रस्ताव आएपछि सहमति भएपछि हामी भाग लिन थालेका छौं । प्रवक्ताको पद फागुन २३ पछि सिर्जना भएको हो । त्यतिबेलादेखि प्रदीप कमरेड हुनुहुन्छ । प्रवक्ता म हुने कि उहाँ हुने भन्ने आउने बैठकले टुंग्याउला । अहिले उहाँले नै त्यसको काम गर्नुहुन्छ । प्रचार विभागको काम मैले गर्छु ।”
